Alla Itolae Nusa 47
Eleki Yusupe ikeu loko Pirone hoko ibeteke kenai be,
“Amaku kai kwalikusi kai esi pipi kai dombaru kai esi taneia maketa lekwe pusulu esi kerilu bei ndi Kanane hoko meije esi me tape Gosene peneka.”
Kai ikeri kwalina sie limaya keu sakesa kaini loko Pirone.
Eleki Pirone itneu Yusupe eni kwalinisi be,
“Imi makerike saisa?”Eleki esi ralake Pirone be,
“Ami meiju amiki makerike pialae binatane, bei amiki ntuana menaru sa eti roma ami meije neka.”Kai esi beteke loko Pirone be,
“Ami luake kena rue mei tapele meije lupe tamata makete le tapuane ete amiki binatane pialaru sae moneka. Ndi Kanane susate manane ktili kuate hoko meije ami kotie bei ale leke ami rue me tape Gosene noma.”
Eleki Pirone ibeteke loko Yusupe be,
“Amamu kai kwalimusi luake lokomu.
Hoko tape Mesire meije sebei alilake otoi misete sa kena amamu kai kwalimusi rue kenae. Hoko sebeisi rue me tape Gosene. Kai arekwa be bei kwalimusi sire pine irekwa lesi kena raka binatane au onoi kena iraka auku binatanaru.”
Yusupe ikeri kai amai Yakupe loko Pirone eleki Yakupe ibeteke loko Pirone be,
“Hlamate ntuane.”
Eleki Pirone iombe,
“Ama amu musuna ila pende?”
Yakupe iombe,
“Auku musuna utuna esa butu telu peneka. Po au rue kena otoi makete keu kena otoi makete rame. Musuna au rue kena otoi maketa meru boka mo saka auku ntuana menaru esi rue kena ootoi maketaru kai au supu susate lekwe.”
Eleki Yakupe ibeteke hlamate ete Pirone, eleki ileu bei Pirone ne.
Eleki Yusupe itiluke tapele otoi ete amai kai kwalinisi kena esi rue kenae me tape Ramesese me tapele Gosene tapele mise titinai kena pialae binatane lulu Pirone ibetekele.
Yusupe ili loko amai kai kwalinisi kai pusue amai eni upuisi kena manane, lulu esi bokalaru.
Hoko me pusue otoi manane sae moneka le susate manane mere ktili titinai eti pusue tamata me Mesire kai Kanane esi tahane rua tiasenete mere moneka.
Hoko esi sabe manane rame bei Yusupe eleki ilupuke pusue kepene rebe esi sabe manane kenare ikeri ete Pirone.
Eleki kena tamata me Mesire kai Kanane pusue esi kepenearu peneka eleki tamata Mesire esi luake loko Yusupe kai esi beteke lokoi be,
“Ntuane, riluke manane ete ami mina! Le ami matare lalemu noa ami moyo? Amiki kepene sae moneka.”
Yusupe iralakesi be,
“Imi kepene sae moneka hoko riluke imi binatane pialaru leke au riluke manane ete imi seli imi binatane meru.”
Esi keri esi binatanaru ete Yusupe eleki Yusupe iriluke manane seli esi kuda, pipi kai domba, sape kai keledai, hoko Yusupe iaknekae manane kena seli esi binatanaru kena musune mere.
Kena musune mere lia peneka, esi luake loko Yusupe kena musune suike, esi beteke lokoi be,
“Ami bunike bei ale moneka kena amiki kepene pusue kai amiki binatanaru uleu ale peneka hoko saisa erue ete ami moneka kena ami rilukele ete ntuane ale makete bei amiki nanakwalama kai amiki tapele.
Ntuane, ami mata kai sebeiye amiki tapele hoko lalemu noa ami moyo? Sabe ami kai amiki tapelaru kena seli manane, hoko ami ono Pirone eni tamata maka ulake kai amiki tapele ete Pirone. Riluke bibite leke tatike pine ami ono ndinu kai leke tapele atia yake kai ami mata yake.”
Eleki Yusupe isabe pusue tapele me Mesire ete Pirone, le tamata Mesire esi abelie esi tapele etei le susate manane mere ktili kuate. Hoko tapele mere ete Pirone. Po batuke imamaru esi tapele Yusupe isabe mo le esi supu manane rame bei Pirone hoko esi tapele esi abelie mo. Eleki Yusupe iriluke bibite ete tamata Mesire me tapele ootoi meru leke esi atnanelu.
[tolong lihat ayat sebelumnya]
[tolong lihat ayat sebelumnya]
Yusupe ibeteke lokosi be,
“Petu meije au sabe imi kai imi tapelaru ete Pirone peneka hoko bibite meije au riluke ete imi leke imi atnanele kena tapele mere.
Eleki esi hasile imi larake kena lua hoko ete imire boka lesi titinai bei ete Pirone. Mere kena bibite kai kena manane ete imi kai tamata rebe irue kai imi kai ete imi anaru.”
Eleki esi beteke ete Yusupe be,
“Araka amiki nasite peneka, masike ami kerike ete Pirone mula mo, mahabe ami supu misete bei ale.”
Hoko Yusupe iteu lepate kena tape Mesire be esi hasile lara luake kai Pirone kena mere, eti roma meije neka. Po batuke imamaru esi tapelaru ete Pirone mo.
Israele irue me Mesire kena tape Gosene hoko esi ono tamata ete mere. Eleki esi nebu boka titinai.
Yakupe irue me Mesire musuna butu esa lesini itu hoko pusue eni musunaru kena utune esa butu ata lesini itu.
Eleki kena takwali mo Israele imatare reneka eleki ikoti loko eni nana Yusupe eleki ibeteke lokoi be,
“Sepo au supu misete bei ale hoko ala eteku be atiluke lalane misete ete au leke hnouke au mei Mesire yake.
Po ahnouke au sakesa kai upukusi. Hoko liku au bei mei Mesire leke hnouke au sakesa kaisi me esi liane benaije ndi Kanane.”
Eleki Yakupe ibeteke loko Yusupe be,
“La eteku.”
Eleki Yusupe ila etei. Eleki Yakupe itatu loko Alla me eni maka ntulure esi uluije.